تقييمي لمجموعة رويال من محلات نزيه

بسم الله الرحمن الرحيم

الحمد لله حمدا لا يليق الا بجلالة وعظيم سلطانه

لاحظت في الاونه الأخيره انه اغلب البنات صار عندهم هوس الشراء اون لاين ومن التاجرات وتقريبا ماعاد يهتمون بالمنتجات المتوفرة تحت يدهم في الاسواق وبأسعار مناسبة جدا وجوده عاليه 

فقررت اوفر عليكم عناء البحث 

وأقيم لكم اليوم منتجات متوفره عندكم يابنات

 رحت نزيه 

حصلت عندهم عرض حلو على مجموعة مسكات وكريمات تقشير رويال 

اخذت ست حبات ب ٤٥ ريال بس 

اللي اليوم راح أعطيكم انطباع عنهم 

نبدء بسم الله

 

بنتكلم عن

1. ماسك النعناع لتنقية البشره
2. قناع الطحالب البحرية لشد البشره
3. كريم سنفرة الوجه والجسم باللوز
4. كريم مقشر للوجه بالتوت
5. كريم الكولاجين المرطب لبشرة الوجه بالدراق

ماسك النعناع

ريحته كأنه معجون اسنان اول مااحطه اكون طبعا مسنفره بشرتي قبل احطه يجلس وجهي يحرقني لثلاث دقايق امر جدا طبيعي لانه حار وبالنعناع

لكن بعد كذا يبرد انتظر لين اشوفه جف على وجهي 

مكتوب عليه من خمس لعشر دقايق بس ممكن أوصله لربع ساعه عادي جدا

بعده أغسل وجهي بمويه فاتره 

ايش أللقى نقاء وصفاء بشره ونضاره فوريه بدون مبالغه

كان عندي كم حبه من حبوب الدوره 

اخفها لي وقتلها تماماً بدون اثر

الود ودي احطه كل يوم من حبي له

استخدمته لكل البيت ومره أعجبتهم النتيجة

عيوبه

ريحته اللي معجون اسنان

لمن يحرق البشره وهذا طبيعي بفعل خواصه 

تقيمي له 

٩/١٠

هل راح ارجع اشتريه نعم

من نزيه

سعره بدون عرض ١٣،٥ ريال سعودي وكميته كبيره بيجلس عندك فتره طويله

قناع الطحالب البحرية لشد البشره

ريحته نوعا ما مقبوله جايه على عطر رجالي شوي فيه قطع كبيره اللي هي عباره عن طحالب فطبيعي جدا وجود هذه القطع

اول ما احطه عالبشره احسه يحك ويحرق البشره

يختفي هذا الشعور بعد مايبرد او بعد دقيقتين

أضعه على بشرتي بعد سنفرة بشرتي

اتركه لمده خمس الي عشر دقايق 

او الي ان يجف وبعده أغسل وجهي بموية فاتره النتيجة بشرة مشدوده نصره وحيويه

عيوبه 

لو تركتيه مفتوح راح يتغير لونه 

وجود القطع الكبيره وهذه طبيعيه

الحكه او اللسعه اللي يسببه اول ما احطه 

متوفر في نزيه بسعر ١٣.٥بدون خصم

تقيمي له 
١٠/١٠

راح ارجع اشتريه طبعا

شكله من الداخل 

كريم سنفرة الوجه والجسم باللوز

ملمسه ناعم كريمي وحبيباته ناعمه ريحته لوز خام مره قويه ويحرق ويلسع بشرتي

 لذلك مااحط الا كميه قليله جدا لكن نتيجته خيال

يرطب وينظف ويخلي البشره تلق لق نظافه ولمعان

ينفع اكثر لبشرة الجسم

عيوبه

يحرق بشرتي ويلسعها حار عليها

ريحته قويه 

ما انصح فيه للبشره الحساسه والملتهبه

تقيمي له نتيجته ١٠/١٠

متوفر في نزيه بسعر حول ١٤ ريال سعودي كميته كبيره ويطول معاك مده

طبعا راح ارجع اشتريه

شكله من الداخل

كريم مقشر للوجه بالتوت

اخذته عشان لونه يونس لكن نتيجته بعد جدا جميله ملمسه ناعم ًحبيباته صغيره

ينفع للبشره الحساسه 

يترك بشره تلقلق نعومه ولمعان 

طريقته 

ابلل وجهي بالماء وأحط السنفره بحركات دائريه أفرك بشرتي ومن اخليه خمس دقايق

اغسله بمويه فاتره

انشف وجهي 

احط الماسك اللي ابي

تقيمي ١٠/١٠

راح ارجع اشتريه

متوفر في نزيه سعر ١٣ ريال تقريبا وكميه تجلس معك مده طويله

كريم الكولاجين المرطب لبشره الوجه

  

جذبني فيه لونه 

استخدمته بعد الماسك ترطيبه عالي جدا

بس لا تتوقعون منه يعبي الفراغات او يشد البشره في فتره قصيره 

الا ممكن بعد فترة استخدام طويله

اذا احتجتي مرطب لذيذ وكميه كبيره وسعر رخيص 

مالك الا هذا 

تقيمي له ٧/١٠

قابل للأكل 😋 

بكذا اكون خلصت البوست اللي أتمنى  انه يكون أعجبكم واستفدتوا منه اشوفكم قريب بإذن الله